Huawei បង្ហាញ​ទូរស័ព្ទ​ថ្មី P20 និង P20 Pro ដែលមាន​កាមេរ៉ា​ល្អ​ដាច់​គេ – Kalib9 បច្ចេកវិទ្យា​ | Kalib9
kalib9

Huawei បង្ហាញ​ទូរស័ព្ទ​ថ្មី P20 និង P20 Pro ដែលមាន​កាមេរ៉ា​ល្អ​ដាច់​គេ

​ក្រុមហ៊ុន​បច្ចេកវិជ្ជា​យក្ស​របស់​ចិន Huawei កាលពី​ថ្ងៃ​អង្គារ​ទី​២៧​មីនា​បានបង្ហាញ​ស្មា​ត​ហ្វូ​ន​ស៊េរី P ថ្មី​របស់ខ្លួន​ដែលមាន​ឈ្មោះថា P20 និង P20 Pro ក្នុង​ក្តី​សង្ឃឹមថានឹង​ទាក់ទាញ​អ្នក​ស្រឡាញ់​វិស័យ​ថតរូប​ជាមួយ​លក្ខណៈពិសេស​ក្នុង​កាមេរ៉ា​កំពូល​របស់ខ្លួន​។​

​លោក រី​ឆាត យូ នាយក​ប្រតិបត្តិ​នៃ​ក្រុម​អាជីវកម្ម​សម្រាប់​អតិថិជន​របស់​ក្រុមហ៊ុន Huawei បានបង្ហាញ​ផលិតផល​សំខាន់ៗ​របស់​ក្រុមហ៊ុន​អំឡុង​ព្រឹត្តិការណ៍​ដាក់​សម្ពោធ​ទូរស័ព្ទ​ថ្មី​នៅ​សាល Grand Palais នៅ​ទីក្រុង​ប៉ារីស​។​

​លក្ខណៈពិសេស​និង​មុខងារ​របស់​កាមេរ៉ា​នេះ​បានក្លាយ​ជាការ​ផ្តោត​សំខាន់​ខ្លាំង​បំផុត​អំឡុង​ការបង្ហាញ​នេះ ជាពិសេស​ទូរស័ព្ទ P20 Pro ជាមួយនឹង​មុខងារ Camera Settings ចំនួន​៣ ដែល​គេ​បង្ហើប​ត្រួសៗ​ពេល​អញ្ជើញ​អ្នកសារព័ត៌មាន​ចូលរួម​ព្រឹត្តិការណ៍​នេះ​។​

​លក្ខណៈពិសេស​នៃ​កាមេរ៉ា ៣ របស់ Leica នេះ​ត្រូវបាន​ចាត់ទុកជា​ទូរស័ព្ទ​ដំបូង​គេ​ហើយ​ដែលមាន​ប្រភេទ​កាមេរ៉ា​បែបនេះ​។ វា​មាន​កែវ Len ប្រភេទ​តេ​ឡេ​ហ្វូ​តូ ៨ មេ​ហ្គា​ភិ​ច​សែ​ល និង​កែវ Len ប្រភេទ RGB ៤០ មេ​ហ្គា​ភិ​ច​សែ​ល ដាក់​នៅក្បែរ​គ្នា ខណៈដែល​កែវ Len ប្រភេទ Monochrome ២០ មេ​ហ្គា​ភិ​ច​សែ​ល​ទី ៣ ត្រូវបាន​ដាក់​នៅ​ខាងក្រោម Len ២​ដំបូង​គេ​នេះ​។​

​យោងតាម​ក្រុមហ៊ុន Huawei បានឱ្យដឹងថា នេះ​អាចឱ្យ​អ្នកប្រើប្រាស់​ថត​ពង្រីក​ជា​លក្ខណៈ​កូនកាត់​បាន ៥​គុណ (5x) ដែល​រួមបញ្ចូល​គ្នា​ទាំង​ការថត​ពង្រីក​អុ​ប​ទិ​ក​និង​ឌីជីថល ខណៈ​សមត្ថភាព​បច្ចេកវិជ្ជា AI របស់​ទូរស័ព្ទ​នេះ (​ដែល​បានមកពី​បន្ទះ​ឈី​ស Kirin 970 ដំបូង​របស់ខ្លួន​ដែល​បានបង្ហាញ​នៅក្នុង​ពិព័រណ៍​ទូរស័ព្ទ Mate 10 កាលពី​ខែតុលា​) នឹង​ជួយ​បង្កើន​គុណភាព​ភិ​ច​សែ​ល​របស់​រូបភាព​។​

​ការច្នៃប្រឌិត​មួយទៀត​របស់​កាមេរ៉ា​នេះ​គឺ Predictive Focus ពោលគឺ​ទូរស័ព្ទ​នេះ​នឹង​ស្នើ​នូវ​ប្រភេទ Camera Settings ដើម្បី​ប្តូរ​ចុះឡើង​អាស្រ័យ​លើ​អ្វីដែល​អ្នកប្រើប្រាស់​កំពុង​ថត​។ ឧទាហរណ៍ ប្រសិនបើ​អ្នកប្រើប្រាស់​បែរ​ទូរស័ព្ទ​ជិត​ផ្ទៃមុខ​របស់​នរណាម្នាក់ នោះ​វា​នឹង​លោត​ចូល Close-Up នៅក្នុង Settings ដោយ​ស្វ័យប្រវត្តិ​។​

​ក្រុមហ៊ុន Huawei និយាយថា នេះ​គឺ​ដោយសារតែ​មុខងារ​បច្ចេកវិជ្ជា AI របស់​ទូរស័ព្ទ​នេះ​តែម្តង​។ បច្ចេកវិជ្ជា​នេះ​ក៏​នឹង​ផ្តល់ជូន​នូវ​យោបល់​អំពី​ប្លង់​ថតរូប​ភាព​ផងដែរ​។​

​បច្ចេកវិជ្ជា​កាមេរ៉ា​ដែល​ធ្វើឱ្យ​ប្រសើរឡើង និង បច្ចេកវិជ្ជា AI នេះ​ក៏បាន​ជួយ​ក្រុមហ៊ុនទូរស័ព្ទ​ចិន​មួយ​នេះ​យក​ប្រៀប​ឈ្នះ​ទៅលើ​គូប្រជែង Apple និង Samsung ផងដែរ ខណៈដែល​ក្រុមហ៊ុន​នេះ​បាន​អួត​ខ្លាំង​អំពី​មុខងារ​សម្គាល់​ផ្ទៃមុខ និង​របៀប​ដែល​អ្នកប្រើប្រាស់​អាច​ដោះ​សោ​ទូរស័ព្ទ​បាន​ក្នុង​រយៈពេល ០,៥ វិនាទី សូម្បី​នៅក្នុង​ស្ថានភាព​ងងឹត​ខ្លាំង​ក៏ដោយ​។​

​ទន្ទឹមនេះដែរ ក្រុមហ៊ុន​និយាយថា ទូរស័ព្ទ P20 នឹងមាន​កាមេរ៉ា ២ ដដែល​ទេ គឺ កែវ Len ប្រភេទ RGB ១២ មេ​ហ្គា​ភិ​ច​សែ​ល និង កែវ Len ម៉ូ​ណូ ២០ មេ​ហ្គា​ភិ​ច​សែ​ល ក៏ដូចជា កាមេរ៉ា​ថត​ស៊ែ​ល​ហ្វី​ខាងមុខ ២៤ មេ​ហ្គា​ភិ​ច​សែ​ល​។​

​ទូរស័ព្ទ P20 បំពាក់​អេក្រង់​ប្រភេទ LCD ៥,៨ អ៊ី​ញ ថ្ម​កម្លាំង ៣៤០០ មិ​ល្លី​អំពែរ​ម៉ោង និង មាន ៥ ពណ៌ ដូចជា ខ្មៅ ខៀវ ផ្កាឈូក ពណ៌​ក្រហម​ដូច​ផ្កាកូឡាប និង ពណ៌​ស្វាយ​។

​ទូរស័ព្ទ P20 Pro បំពាក់​ជាមួយ​អេក្រង់​ប្រភេទ OLED ៦,១ អ៊ី​ញ និង​ថ្ម ៤០០០ មិ​ល្លី​អំពែរ​ម៉ោង និង មាន​ពណ៌​ដូចខាងលើ លើកលែងតែ​ពណ៌​ក្រហម​៕ ដោយ៖ កញ្ញាដាលីស

Who want to apply to study in Japan? And don’t know how to apply, right? Ok, Don’t worry. Please take your mobile and then call to 069373168 for consulting. Don’t be late because admission nearly close.